Нийгмийн даатгалын “Шилдэг шимтгэл төлөгч-ажил олгогч” байгууллагаар “Эрдэнэт үйлдвэр” ТӨҮГ шалгарлаа

   Өнөөдөр Монгол Улсын Нийгмийн Даатгалын Ерөнхий Газраас “Шилдэг шимтгэл төлөгч-ажил олгогч” байгууллагууддаа хүндэтгэл үзүүлэх үйл ажиллагааг зохион байгууллаа. Арав дахь удаагийн энэхүү уламжлалт шалгаруулалтаар 2018 онд Нийгмийн даатгалын тухай хуулийн дагуу хүлээсэн үүргээ нэр төртэй биелүүлэн, нийгмийн даатгалын шимтгэл төлөлтийн тайлангаа хугацаанд нь илгээж, өр үүсгэлгүй, ажиллагсдаа нийгмийн даатгалд бүрэн хамруулж, төлсөн шимтгэлийн хэмжээгээрээ бусдыг тэргүүлэн, нийгмийн даатгалын сангийн орлогыг бүрдүүлэхэд үнэтэй хувь нэмэр оруулсан 15 шилдэг ажил олгогчийг тодруулан, өргөмжлөв.
   Өнгөрсөн оны ажлаараа манлайлж, ажиллагсдынхаа нийгмийн баталгааг хангаж ажилласан “Шилдэг шимтгэл төлөгч, ажил олгогч” байгууллагаар “Эрдэнэт үйлдвэр” ТӨҮГ тодорч, "Оюу толгой"  ХХК, "Рэдпаф Монгол" ХХК, Хаан банк, ТЭСО групп, "Болд төмөр ерөө гол" ХХК, "Саппорт сервис Монголиа" ХХК, Дархан-Уул аймгийн Улаанбаатар төмөр замын 1-р анги, "Цайрт минерал" ХХК, Санхүү эдийн засгийн  их сургууль, "Эрдэм Транс" ХХК, "Эпирок Монголиа" ХХК, "Алтай трест" ХХК, Баян-Өлгий аймгийн Цахилгаан шугам сүлжээний газар, Хужирт рашаан сувилал зэрэг аж ахуй нэгжүүд удааллаа.
   Нийгмийн Даатгалын Ерөнхий Газрын нийгмийн даатгалын санд 1.1 их наяд төгрөг төвлөрчээ. Үүний 143.5 тэрбум төгрөг буюу нийт орлогын 10 хувийг нийгмийн даатгалын шимтгэл төлөгч 45.6 мянган ажил олгогчийг тэргүүлсэн эдгээр шилдэг аж ахуйн нэгжүүд бүрдүүлсэн байна.
   Шилдэг шимтгэл төлөгч дээрх байгууллагуудын 19.5 мянган даатгуулагчаас 6583 иргэн, 2300 гаруй ахмад настнууд нь “Эрдэнэт үйлдвэр” ТӨҮГ-ын харьяат ажилтан, тус үйлдвэрээс өндөр насны тэтгэвэр тогтоолгосон ахмадууд юм.
 

Э.Мөнх-Уянга

Б.Ялалт