Уурхайчин гэр бүл

   Ургах нарыг угтан мэндчилж, улс орныхоо төлөөх их үйлсэд гар бие оролцож, өөрийн хувь нэмрээ зориулахаар ажил руугаа яаран алхах сайхан. Гэр бүл, хайртай үрсийнхээ гэгээн ирээдүйг бүтээхээр өнөөдрийн ажлаа төлөвлөн алхах энэ бүсгүй бол Дашнямын Цэнд-Аюуш. Тэрээр Эрдэнэт үйлдвэрийн дэргэдэх Технологийн сургуулийн номын санч. Түүний нөхөр Бямбаа нь Хүдрийн ил уурхайн цахилгааны хэсэгт цахилгаанчин. Эрдэнэт үйлдвэр ТӨҮГ-т ажиллаж эрдэнэсийн өлгий Эрдэнэт хотод амьдардаг эгэл нэгэн “Уурхайчин гэр бүл”-ийг танилцуулж байна.

   Өрхийн тэргүүн Ц.Бямбаа Өмнөговь аймгийн Ноён сумын харьяат бөгөөд кино техникч, цахилгаанчин мэргэжилтэй. Харин Д.Цэнд-Аюуш номын санч, ном зүйч. Тэд хоёулаа Эрдэнэт үйлдвэрт 16 дахь жилдээ ажиллаж байгаа хоёр сайхан охидын ээж аав. Ууган охин Б.Нарангарав эмчийн мэргэжилтэй нийслэлд  ажиллаж  ажилладаг. Бага охин Номин-Эрдэнэ МУИС-ийн 2-р курсийн оюутан юм.

   1990 онд их сургуулийнхаа дотуур байранд танилцсан хоёр оюутан сургуулиа төгсөөд захидлаар харилцдаг байж. 1995 онд говийн хүү Эрдэнэт хотод амьдрахаар зориг шулуудан сэтгэлт бүсгүй рүүгээ ирсэн нь Ц.Бямбаагийнх гэх нэгэн айлын гал голомтыг бадраах шалтгаан байв. Зах зээлд шилжээд удаагүй байсан тухайн үед айл орон болж амьдрал зохиоход амар байгаагүй ч хайр сэтгэлийн илчинд хоёр биеэ түшиж амьдралыг ёстой л “тэг”-ээс эхэлжээ.   

   Тэд амьдралынхаа бүхий л цаг үед хамтдаа хичээж, хамтдаа зүтгэж. Санаа зөвийн сайнаар хүний дайтай сайхан амьдарч ижил хөөрхөн охидоо өсгөж хүмүүжүүлжээ. Бага залуудаа “ГОК” хэмээх их айлын гишүүн болохыг мөрөөдөж явтал энэ сайхан хамт олны эд эс нь болох азтай хувь 2003 онд тохиож, тэд хоёул Эрдэнэт үйлдвэрт ажилд оржээ. Ц.Бямбаа хамт олныхоо хөдөлмөрийн аварга, шилдэг шинийг санаачлагч, Эрдэнэт үйлдвэрийн 100 шилдэг санаачлагч ажилтнаар гурван ч удаа шалгарсан тэргүүний ажилтан юм.

   Д.Цэнд-Аюуш мэргэжлээрээ улсад 27 жил, Технологийн их сургуульд 16 дахь жилдээ ажиллаж байна. Ажил мэргэжилдээ гаршсан, хамт олондоо нэр хүндтэй нийгмийн идэвхтэй, сургуулийн эмэгтэйчүүдийн зөвлөлийн дарга, ҮЭ-ийн тэргүүлэгч гишүүн зэрэг сонгуульт ажлыг хийж иржээ. Тэр Монгол улсын Соёлын тэргүүний ажилтан цолтой. Чөлөөт цагаараа шүлэг найраг, нийтлэл бичих, хамт олондоо нөхөрсөг элэглэл бичих дуртай. Урлаг уран сайхны ажилд манлайлан оролцдог чамбай бүсгүй. Тэрээр мэргэжлийн дагуу намтар номзүй болон бүртгэн мэдээлэх номзүйн бүртгэлүүдийг эмхэтгэн гаргадаг, сургуулийнхаа 45 жилийн ойгоор шүлгийн номоо гаргахаар бэлтгэж байгаа аж.

   Эрхэлсэн ажилдаа эзэн нь байх дуртай. Ийм л эгэл түүхийн эзэд Уурхайчин гэр бүл дэлхийн шилдэг аж ахуй нэгж, Зууны манлай бүтээн байгуулалт Эрдэнэт үйлдвэрт ажиллаж, өөрсдийн чадах хэрээр хувь нэмрээ оруулж байгаадаа омогшин баярладаг. Цай сүүнийхээ дээжийг энэ сайхан нутгийнхаа уул овоонд сүсэглэн өргөдөг эгэл нэгэн Уурхайчин гэр бүл юм.

Б.Учрал